मोफसलमा क्रियाशील पत्रकार कुम्भराज र गजेन्द्र राई पुरस्कृत
काठमाडौं : पत्रकार कुम्भराज राई र गजेन्द्र राई पुरस्कृत भएका छन् । आइतबार किरात राई पत्रकार संघ (क्राजा) ले आफ्नो १६औँ स्थापना दिवसको अवसरमा उनीहरूलाई पुरस्कार प्रदान गरेको हो।
कृषि विज्ञ मदन राईद्वारा स्थापित अक्षय कोषबाट संघले हरेक वर्ष राई पत्रकारहरूलाई पुरस्कृत गर्दै आएको हो । सो पुरस्कारको राशि जनही १० हजार रुपैयाँ रहेको छ।
पुरस्कृत कुम्भराज कान्तिपुर दैनिकको ओखलढुंगा संवाददाता हुन् भने गजेन्द्र रेडियो नेपालकाे उदयपुर संवाददाताको रुपमा बिगत लामो समयदेखि काम गर्दै आएका छ् । संघले हरेक वर्ष कृषि विज्ञ मदन राईद्वारा स्थापित अक्षय कोषबाट राई पत्रकारहरूलाई पुरस्कृत गर्दै आएको छ।
कार्यक्रममा यायोक्खाका अध्यक्ष राईले पत्रकारिता क्षेत्रमा रहेर देशको सेवा गर्दै आएको बताए। ‘पत्रकारहरूले किरात समुदाय भित्र रहेर विभिन्न माग,मुद्धाको विषयमा पनि उजागर गर्दै राज्यलाई घचघच्याउँने काम गर्दै आएका छन्,याे साथ सधै चाहिन्छ’उनले भने ।
संघका केन्द्रीय अध्यक्ष अवतार राईले उपत्यकामा मात्र नभई देशका विभिन्न जिल्लाहरूमा पनि विविध कार्यक्रम आयोजना गरी १६ औँ स्थापना दिवस मनाइरहेको जानकारी दिए। उनले यही बेला संघको बार्षिक समिक्षासमेत गर्ने गरेको र कमजोरीहरूलाई सुधार गर्दै जाने प्रतिवद्धता जनाए ।
