Logo

वाकु जोड्ने कायखेत मोटरेबल पुलको उद्घाटन


सोलुखुम्बु – थुलुङ दुधकोशी गाउँपालिका ८ रणेम र माप्य दुधकोशी गाउँपालिका वडा नम्बर ६ र ७, वाकु जोड्ने नवनिर्मित कायाखेत दुधकोशी मोटरेबल पुलको उद्घाटन गरिएको छ ।

पुलको आज आयोजित एक कार्यक्रममा प्रदेश सांसद बुद्धि कुमार राजभण्डारी, गाउँपालिका अध्यक्ष बुद्धिकिरण राई र उपाध्यक्ष जुनितामाया मगरले संयुक्त रुपमा उद्घाटन गरेका हुन् ।

३० टन भारवहान क्षमता रहेको पुल ३६.५७ मिटर लामो रहेको छ । करिब साढे पाँच करोडको लागतमा जलप नेपाल कन्ट्रक्सनले निर्माण गरेको पुलमा संघीय सरकार स्थानीय पुर्वधार विकास साझेदारी कोषको १ करोड १० लाख, प्रदेश सांसद कोषको ५० लाख, प्रदेश सरकारको २ करोड र बाँकी रकम माप्य दुुधकोशी गाउँपालिकाले बेहोरेको छ । प्रदेश सरकारले बजेट निकासा गर्न ढिलाएपछि निर्माण कम्पनीले उधारोमा पुल निर्माण गरिदिएको बताइएको छ ।

गाउँपालिकाका अनुसार कम्पनीले एक करोड ३७ लाखको हाराहारीमा भुक्तानी पाउनै बाँकी रहेको छ । उद्घाटनपछिको औपचारिक कार्यक्रममा प्रदेश सांसद राजभण्डारीले भष्ट्राचारलाई निरुत्साहित पार्दै आफ्नो निर्वाचन क्षेत्रको विकासमा कुनै कन्जुस्याँई नगरेको दाबी गरे । हिजो बजेटका कारण पुल बन्न ढिलाइ हुँदा आलोचना गर्ने पक्षलाई धन्यवाद दिदै पुलले जोडेको सडक सञ्जालले वाकुका नागरिकको जीवनशैलीमा अर्थ राख्ने बताए ।

जिल्ला समन्वय समिति संयोजक वीर कुमार राईले जनप्रतिनिधिको कामको प्रशंसा गर्दै कायाखेतमा पुलले वाकुको विकासमा दीर्घकालिन टेवा पुर्याउने बताए ।

कार्यक्रममा माप्य दुधकोशी गाउँपालिका अध्यक्ष बुद्धिकिरण राईले सर्वपक्षिय विकासमा ध्यान दिएको दाबी गर्दै कुनैपनि विरोधले अर्थ नराख्ने बताए । उनले नेकपा एमालेले देखेको एउटा सपना पुरा भएको दाबी गर्दै सगरमाथा माविमा आगामी शैक्षिक सत्रबाट कक्षा ११ र १२ पढाइ शुरु हुने बताए ।

विद्यालयमा प्लस टु संचालनका लागि नेकपा माओवादी केन्द्र माप्दु धकोशीका नेता गौरब खालिङले ५५ हजार ५५५ रुपैँया सहयोग गर्ने घोषणा गरे ।

नेकपा एमालेका केन्द्रीय सदस्य मानवीर राईले विकासको नाममा खिसिट्यूरि गर्नेहरुलाई कायाखेतको माटरेबलले गतिलो जवाफ दिएको बताए । उनले एमाले कुनाकन्दरामा रहेका जनताको सुविधाका लागि अग्रसर बनेको दाबी गरे ।

माप्य दुधकोशी गाउँपालिका उपाध्यक्ष जुनितामाया मगरले पुलले वाकु क्षेत्रको संभावनाको ढोका खोलेको बताइन् । नेकपा एमालेका प्रदेश कमिटी सदस्य महेश किराँतीले जनप्रतिनिधिहरुले विकासको लागि खेलेको भूमिका कामले प्रष्ट पारेको बताए । वडाअध्यक्षहरु सगुजित राई र दिनेश राईले दुधकोशीमा निर्मित पुल संचालनलले वाकुवासीलाई यात्रा, सामाग्री ढुवानीका साथै स्थानीय उत्पादन बजारीकरणमा समेत टेवा पुग्ने बताए ।

प्रकाशित मिति : बुधबार, २३ चैत्र २०७८ १८:१६

Archives

प्रतिक्रिया दिनुहोस्