कृषि मन्त्रालयको सचिवमा सोलुखुम्बुका डा.योगेन्द्रकुमार कार्की नियुक्त
काठमाडौं, १० मंसिर । डा. योगेन्द्रकुमार कार्की नेपाल सरकार कृषि तथा पशुपन्छी विकास मन्त्रालयको सचिव पदमा नियुक्त भएका छन् । मन्त्रीपरिषद्को आज बसेको बैठकले डा.कार्कीलाई सचिवमा बढुवा गरेको हो ।
उनी सोही मन्त्रालयमा वरिष्ठ सहसचिवका रुपमा कार्यरत थिए । यसअघि डा. कार्की वागमती प्रदेश सरकारको भूमिव्यवस्था, कृषि तथा सहकारी मन्त्रालयको सचिवका रुपमा सेवारत थिए । यसअघि डा.कार्कीले कृषि तथा पशुपन्छी विकास मन्त्रालयको वैदेशिक समन्वय, योजना, अनुगमन तथा मूल्यांकन महाशाखाको नेतृत्व गरेका थिए।
डा. कार्कीले कृषि अर्थशास्त्रमा विद्यावारिधी गरेका छन् । उनी दातृ निकायको अनुदानमा सञ्चालित आयोजनाहरूको डिजाईन र कार्यान्वयनका क्षेत्रका च्याम्पियन मानिन्छन् । उनले एसियाली विकास बैंक, विश्व बैंक तथा संयुक्त राष्ट्रसंघको आर्थिक सहयोगमा सञ्चालित विभिन्न आयोजनाहरुका निर्देशकका रुपमा पनि सेवा गरिसकेका छन् ।
डा. कार्की सुप्रवल जनसेवा श्री मानपदवी, सुप्रवल गोर्खा दक्षिणवाहु जस्ता प्रतिष्ठित राष्ट्रिय सम्मानबाट पनि विभूषित छन् । प्रतिष्ठित व्यवसायी तथा समाजसेवी खड्गबहादुर कार्की तथा श्रीमती मन माया कार्कीको माहिँला छोराको रूपमा जन्मेका डा. कार्की सगरमाथाको काखमा अवस्थित नेलेको रणसुर कार्की परिवारका सन्तान हुन् ।
डा.कार्कीले देशको प्रतिनिधत्व गर्दै विश्वका ७० भन्दा बढी देशहरूको भ्रमण गरी ती देशहरुमा आयोजित कार्यक्रमहरुमा नेपालका तर्फबाट कार्यपत्रहरु प्रस्तुत गरिसकेका छन् । श्रीमती रमलासँग विवाह गरेका कार्कीदम्पत्तीका एक छोरी सोनिया र दुई छोरा हिमाल र सागर छन् ।
डा. कार्कीका विभिन्न जर्नलहरुमा २ दर्जनभन्दा बढी अनुसन्धनात्मक लेखहरु प्रकाशित छन् । त्यस्तै उनले विभिन्न पदमा रही दर्जनभन्दा बढी अनुसन्धानहरु पनि गरेका छन् । उनले देशविदेशमा गरी १५ भन्दा बढी विषयमा तालिम पनि लिएका छन् । हाल उनी नेपाल कृषि अर्थशास्त्र समाजका अध्यक्ष हुन् । त्यस्तै उनी अन्तरराष्ट्रिय प्रसार शिक्षा समाजका उपाध्यक्ष पनि हुन् । उनले देशका विभिन्न संघसंस्थाको अध्यक्षता पनि गरिसकेका छन् ।
