कोशी प्रदेश नामाकरणको बिरुद्ध सोलुखुम्बुमा पनि प्रदर्शन
सोलुखुम्बु– कोशी प्रदेश नामाकरणको बिरुद्ध पहिचान पक्षधरहरूले सोलुखुम्बुको सल्लेरीमा विरोध प्रदर्शन गरेका छन् । २०७९ फागुन १७ गते प्रदेश नम्बर १ को नाम कोशी प्रदेश नामाकंन गरिएको भन्दै त्यसलाई कालो दिनको संज्ञा दिँदै विहिबार उनीहरुले विरोध प्रदर्शन गरेका हुन् ।
पहिचानको आधारमा प्रदेशलाई पुनः नामाकंन गर्नुपर्ने माग राख्दै प्रदेश नं. १ पुनः नामाङकरण संयुक्त संघर्सष मिति सोलुखुम्बुको नेतृत्वमा सो प्रदर्शन भएको हो ।
सल्लेरीको आवाडाँडा कुनाबाट सूरु भएको जुलुस तीनकुने हुँदै बसन्तबजार पुगेर जिल्ला प्रशासन कार्यालयको गेटमा कोणसभामा परिणत भएको थियो । कालो झण्डा र नो कोशी लेखिएको प्लेकार्डसहित निकालिएको र्यालीमा सहभागी प्रदर्शनकारीहरुले पहिचानविरोधी होसियार, कोशी प्रदेश खारेज गर, पहिचानको आधारमा सबै प्रान्तको नामाकरण गरलगायतका नारा लगाउँदै सल्लेरी बजार परिक्रमा गरेका थिए ।
प्रदेश नम्बर १ पुनःनामाकरण संघर्ष समिति सोलुखुम्बुका संयोजक राम संघर्ष किरातीले पहिचानका आधारमा नामाङकन नभएसम्म आन्दोलन जारी रहने बताउनुभयो ।
प्रदर्शनमा पहिचानवादी नेताहरु लाक्पा शेर्पा, वियस राई, महेश वर्तमान मगर, मिंमार शेर्पा, करिना कृस्टी राईसँगै आदिवासी जनजाति महासंघ तथा जिल्लाका विभिन्न जातीय संघ संस्थाका प्रमुख तथा प्रतिनिधीहरुको उपस्थिति रहेको थियो ।
