एनएमए अध्यक्षमा माओवादी निकट पाण्डेको उम्मेदवारी घोषणा, टिम निर्माणका लागि वार्ता समिति गठन
काठमाडौं, १२ असार । नेपाल पर्वतारोहण संघ (एनएमए)को आगामी २०८२ साल भदौं ७ (२३ अगष्ट २०२५) मा सम्पन्न हुन लागेको निर्वाचनमा वर्तमान वरिष्ठ उपाध्यक्ष ठाकुर राज पाण्डे अध्यक्षको उम्मेदवार बन्ने भएका छन् । नेकपा (माओवादी केन्द्र) निकट संगठन नेपाल पर्यटन व्यवसायी संगठनले सोमबार ठमेलमा एक कार्यक्रमको बीचमा पाण्डेको उम्मेदवारी घोषणा गरेको हो ।
धादिङका पाण्डेले यसअघि नै एनएमएको महासचिवका रुपमासमेत काम गरिसकेका छन् । नम्र स्वभावका उनी पर्वतीय पर्यटन क्षेत्रमा लामो अनुभव संगालेका बरिष्ठ पर्यटन व्यवसायी हुन् ।
संगठनले पाण्डेको उम्मेदवार घोषणासँगै सर्वपक्षीय छलफल गरेर प्यानल निर्माणका लागि औपचारिक रुपमा पहल सुरु गरेको छ । जसका लागि संगठनका अध्यक्ष नवराज पाण्डेको संयोजकत्वमा एक वार्तासमितिसमेत घोषणा गरेको छ ।
वार्ता समितिको सदस्यहरुमा ऋषि भण्डारी, अविर मल्ल, राजेन्द्र लामा, दावा शेर्पा, अम्बीर गुरुङ र राजकुमार धमला रहेका छन् । उक्त समितिलाई विभिन्न विकल्पहरुमा संवाद गरेर निष्कर्ष निकाल्ने म्याण्डेट रहेको बुझिएको छ । 
