एनएमएको आसन्न निर्वाचनः उम्मेदवार घोषणा जारी, भण्डारी र नहर्कीले पनि उम्मेदवारी दिने
काठमाडौं, १२ असार । नेपाल पर्वतारोहण संघ (एनएमए)को आसन्न निर्वाचनका लागि विभिन्न पदमा धमाधम उम्मेदवारी घोषणा भइरहेको छ । यसै सन्दर्भमा पर्यटकीय संघसंस्थाहरुको नेतृत्व दलगत भागबण्डा भन्दा माथि उठेर व्यावसायिक र पेशागत सक्षमताका आधारमा ल्याइनुपर्नेमा जोड दिदै आएका पर्यटन व्यवसायी बोधराज भण्डारीले एनएमएको बरिष्ठ उपाध्यक्ष पदमा उम्मेदवारी दिने घोषणा गरेका छन् ।
उनले व्यावसायिक एकता, दीगो पर्वतीय पर्यटनको विकास र संस्थागत सुशासनका लागि आफुले उम्मेदवारी दिन लागेको बताएका छन् ।
त्यस्तै, अर्का व्यवसायी विमल नहर्कीले उपाध्यक्ष पदमा उम्मेदवारी दिने घोषणा गरेका छन् । भण्डारी र नहर्कीले सामाजिक सञ्जाल फेसबुकबाट आफ्नो उम्मेदवारी घोषणा गरेका हुन् ।
नयाँ नेतृत्व चयनका लागि आगामी २०८२ साल भदौं ७ (२३ अगष्ट २०२५) मा एनएमएको निर्वाचन हुँदैछ ।
हालसम्म अध्यक्ष पदका लागि फुर्वा ग्याल्जेन शेर्पा, कुल बहादुर गुरुङ, ठाकुरराज पाण्डे र टिकाराम गुरुङले आफ्नो उम्मेदवारी घोषणा गरिसकेका छन् । उनीहरुले अध्यक्ष पदका लागि आफ्नो एजेण्डा प्रस्तुत गरेपनि प्यानल नै भने घोषणा गरिसकेका छैनन् । यद्यपी, प्यानल निर्माणका लागि विभिन्न तह र तप्काबाट छलफल जारी छ । जसले गर्दा पर्यटन बजार तातिएको छ ।
