एनएमए अध्यक्षका आकांक्षीहरुको दरबारमार्ग भेट : सर्वसम्मत भने सबैले, छोडेनन् कसैले
काठमाडौं, १५ असार । नेपाल पर्वतारोहण संघ (एनएमए)को निर्वाचन सरगर्मी बढिरहेको बेला सर्वसम्मत नेतृत्व चयनका लागि वर्तमान अध्यक्ष निमानुरु शेर्पाले पहल लिएका छन् । एनएमए वर्तमान नेतृत्वको पहलमा भावी अध्यक्षका दाबेदारहरु ठाकुरराज पाण्डे, फुर्वा ग्याल्जेन शेर्पा, कुलबहादुर गुरुङ र टिकाराम गुरुङबीच विहिबार दरबारमार्गमा भेट तथा छलफल भयो ।
आकांक्षीहरुबीचको सामुहिक भेट तथा छलफल यो नै पहिलो हो । सर्वपक्षीय छलफलमा चारै जनाले आ-आफ्नो दाबी दाहोर्याए । सो क्रममा भावी नेतृत्वका लागि विभिन्न विकल्पमा छलफल भएपनि निचोड निस्केन । यथासम्भव सर्वसम्मत रुपमा जानका लागि संवादको वातावरण भने यो भेटबाट तयार भएको स्रोतले दाबी गरेको छ ।
पर्यटकीय संघसंस्थाका लागि विगतमा भएको अस्वस्थ्य चुनावी प्रतिस्पर्धाका कारण अहिले चुनावबाट पर्यटन व्यवसायीहरु आजित छन् । एनएमए निर्वाचन मिति घोषणालगत्तै व्यवसायीहरुले विभिन्न माध्यमबाट संस्थाको नेतृत्वका लागि दलगत भागबण्डा र अस्वस्थ्य प्रतिस्पर्धा हुन नहुने मत जाहेर गर्दै आइरहेका छन् ।
त्यसोत, अध्यक्ष पदका चारै जना आकांक्षीहरुले आफ्नो उम्मेदवारी घोषणा गर्ने क्रममा विभिन्न एजेण्डा सार्वजनिक गर्दै आफुभन्दा सिनियर उम्मेदवार आए दाबी फिर्ता लिन सक्ने भाषा बोलेका छन् । तर, आफु भन्दा सियिनर भनेको को र कस्तो भन्ने विकल्प भने उनीहरु कसैले दिएका छैनन् ।
अहिलेसम्म अध्यक्ष र केही पदमा उम्मेदवारी घोषणा भएपनि प्यानल नै भने बनिसकेको छैन । शब्द र भाषणमा संघसंस्थामा दलगत भागबण्डा हुन नहुने भनिएपनि अध्यक्षका आकांक्षीहरुले आफ्नो उम्मेदवार घोषणाकै क्रममा गठन गरेका वार्ता कमिटी र पछिल्लो प्रचार तथा लविङलाई हेर्दा अन्ततः चुनावको लागि आफुअनुकुल भागबण्डा र गठबन्धन नगर्लान् भन्न सकिने ठाउँ भने छैन ।
एनएमएको वर्तमान कार्यसमितिको कार्यकाल सकिएपछि नयाँ नेतृत्व चयनका लागि आगामी २०८२ साल भदौं ७ (२३ अगष्ट २०२५) मा निर्वाचन मिति तय गरिएको छ ।
