एभरेष्ट दुधकोशी साँस्कृतिक पदमार्गको अफिसियल लञ्चिङ भाद्र १६ गते काठमाडौंमा हुँदै, पर्यटन बोर्डमा सबैलाई निमन्त्रणा
काठमाडौं । सोलुखुम्बु जिल्लाको माप्य दुधकोशी गाउँपालिकाभित्र पर्ने पर्ने एभरेष्ट दुधकोशी साँस्कृतिक पदमार्गको अफिसियल लञ्चिङ गरिने भएको छ । गाउँपालिका, ट्रेकिङ एजेन्सिज् एशोसिएशन अफ नेपाल (टान)सँगको सहकार्य तथा जीविकोर्पाजन पुनर्उत्थानका लागि दीगो पर्यटन (एसटीएलआरपी)समेतको आर्थिक सहयोगमा तयार गरिएको उक्त पदमार्गको यही भाद्र १६ गते काठमाडौंमा अफिसियल लञ्चिङ गर्न लागिएको हो ।
रक्षामन्त्री मानबीर राईको प्रमुख आतिथ्यता तथा संस्कृति, पर्यटन तथा नागरिक उडडयन मन्त्रालयका सचिवलगायतको उपस्थितिमा आयोजना गर्न लागिएको उक्त कार्यक्रम नेपाल पर्यटन बोर्डको सभाहलमा आयोजना गर्न लागिएको गाउँपालिकाले जनाएको छ ।
५ देखि ९ दिन अवधिको सो पदमार्ग सम्बन्धी निर्माण गरिएको वृत्तचित्र, म्याम, आइटेनरी तथा प्रचारमूलक सामाग्रीहरु सार्वजनिक गरिने गाउँपालिका अध्यक्ष बुद्धि किरण राईले बताउनुभयो । दिउसो २ बजे उपस्थित देखि सुरु हुने उक्त कार्यक्रममा सम्बद्ध सबैलाई गाउँपालिकाले निमन्त्रणा गरको छ ।
उक्त पदमार्गको गत वर्ष उद्घाटन गरिनुका साथै फार्म टिपसमेत आयोजना गरिएको थियो । त्यसपछि धेरै आन्तरिक तथा वाह्य पर्यटकहरुले सो पदमार्गको अवलोकनका लागि पुगिरहेको जनाइएको छ ।
माप्य दुधकोशी गाउँपालिकाको वडा नं. ५ मा अवस्थित सिलगुढी डाँडाबाट सुरु हुने उक्त पदमार्ग सुन्दर गाउँ घुम्नेमेरा हुँदै सुन्दर प्राकृतिक भ्यू पोइन्ट तथा जंगलहरु छिचोल्दै राप्छा, बासा, खास्ताप, काँकु र जुभिङ तथा वाकुसमेतलाई समेटिएको छ । एभरेष्ट रुटमा पर्ने उक्त पदमार्गको प्रवर्द्धन गर्न सकेको खण्डमा प्रचुर सम्भावना देखिन्छ ।
एभरेष्ट जाने र फर्किने पर्यटकले छोटो समयावधिमा विविध प्रकृति र संस्कृतिको अध्ययन, अवलोकन तथा अनुभव गर्न सक्ने छन् भने आन्तरिक पर्यटकका लागि पनि आकर्षक गन्तव्य हुन सक्दछ । त्यस्तै मेरा पीकको वैकल्पिक मार्गको रुपमा पनि यस पदमार्गलाई जोड्न सकिने सम्भावना छ ।
उक्त कार्यक्रममा २ सय भन्दा बढि ट्रेकिङ कम्पनी, ट्रेकिङ गाइड, सम्बद्ध निकाका प्रतिनिधि, पर्यटकीय संघसंस्था तथा पत्रकारहरुको उपस्थिति रहने जनाइएको छ ।
