उपाध्यक्ष ङावा ङिमासहित १७ जना शेर्पा व्यवसायीद्वारा एमाले पर्यटन संगठनबाट सामुहिक राजीनामा
काठमाडौं । नेकपा (एमाले) निकट पर्यटन व्यवसायीहरुकोसंगठन नेपाल राष्ट्रिय पर्यटन व्यवसायी संगठनका उपाध्यक्ष ङावा ङिमा शेर्पाको नेतृत्वमा १७ जनाले सामुहिक राजिनामा दिएका छन् । भर्खरै सम्पन्न नेपाल पर्वतारोहण संघ (एनएमए)को निर्वाचनमा व्यावसायिक हित र संरक्षणको पक्षमा उभिँदा संगठनका नेतृत्वहरुबाट सामाजिक सञ्जालमार्फत आफूलाई जोडेर सिंगो समुदायलक्षित अभिव्यक्ति आइरहेकोमा असन्तुष्टी जनाउँदै संगठनमा आवद्ध शेर्पा नेताहरुले सामुहिक राजीनामा दिएका हुन् ।
एनएमए निर्वाचनमा गठबन्धन गर्ने नाउँमा अध्यक्ष, महासचिवलगायत अधिकांश पद कांग्रेसलाई दिने निर्णय गरेपछि ङावा ङिमा शेर्पाको नेतृत्वको टिमले स्वतन्त्र व्यवसायी फुर गेल्जे शेर्पा समुह बनाएर निर्वाचनमा जिताउन मुख्य भूमिका खेलेका थिए ।उनीहरुले सोमबार एक विज्ञप्तिमार्फत राजीनामासँगै आफ्नो धारणा सार्वजनिक गरेका हुन् ।
राजीनामा दिनेमा ङावा ङिमा शेर्पासहित पासाङ शेर्पा, चेङ्गा छिरिङ शेर्पा, नाङ तादो शेर्पा, फुरी गेल्जेन शेर्पा, फुरी लाक्पा शेर्पा, ङिमा दोर्जी शेर्पा, माया शेर्पा, पेमछिरि शेर्पा, आङ पेम्बा शेर्पा, पेम्बा शेर्पा रहेका छन् । त्यस्तै, वाङ्दा शेर्पा, राजेश्वरी थापा मगर, रिञ्जी जाङ्बु शेर्पा, दोर्ची शेर्पा, फुर्वा तेन्जिङ शेर्पा र कर्मा शेर्पाले पनि राजीनामा दिएका छन् ।
सबैले विगतमा संगठनप्रति ईमानदारिता, निष्ठा र पेशागत समर्पणका साथ योगदान दिँदै आएको तर, पछिल्ला घटनाक्रमले हाम्रो समुदायप्रति सम्मानको गम्भीर अभाव महसुस गराएको उनीहरुको भनाई छ ।
”विशेषतः, शेर्पा समुदायप्रति लक्षित असंवेदनशील अभिव्यक्तिहरू, समावेशीताको कमी, तथा संगठनको नाममा भइरहेको राजनीतिक प्रयोगप्रति हाम्रो स्पष्ट असहमति रहेको छ” सामुहिक राजीनामामा लेखिएको छ, ”अध्यक्षज्यूसहित पदाधिकारीहरूबाट सामाजिक सञ्जालमार्फत हाम्रो समुदायलाई लक्षित गरी दिइएका अभिव्यक्तिहरूको हामी कडा विरोध प्रकट गर्दछौं ।” 
