उपसभामुखबाट राजीनामा दिएकी तुम्बाहाङफेले अब कार्यक्षेत्र परिवर्तन गर्ने
उपसभामुखको रुपमा एउटै ठाउँमा ५ वर्ष खर्चिनु नपरेको परिस्थितिका कारण पदबाट राजीनामा दिँदा आफू खुसी भएको तुम्बाहाङफेको भनाइ छ ।
‘एउटा ठाउँमा, एउटा क्षेत्रमा मैले ५ वर्ष खर्चिनु परेन, यो विषयले पनि म आज खुसी छु, मेरो प्रगतिलाई यसले बाटो दिएको छ,’ तुम्बाहाङफेले भनिन्, ‘मैले आजदेखि उपसभामुख पद छाडिसके, राजीनामा दिइसके । मैले मेरो कार्यक्षेत्र परिवर्तन गर्दै छु । म यू–टर्न लिएर अगाडि बढ्दै छु ।’
उपसभामुखबाट राजीनामा दिएपछि आफूले गरेको अपेक्षा पूरा गर्नेतर्फ केन्द्रित हुने पनि तुम्बाहाङ्फेको भनाइ छ । ‘मलाई लाग्छ आजको दिनदेखि मैले जे अपेक्षा गरेको छु, त्यो अपेक्षा अनुसार कोशिष गर्ने छु, र मैले कोशिष गरेपछि म त्यो ठाउँमा पुगेरै छोड्छु,’ तुम्बाहाङफेले भनिन् ।
प्रतिनिधिसभामा रहँदा संविधान र कानूनानुसार गर्नुपर्ने धेरै काम गरेको पनि तुम्बाहाङ्फेले दाबी गरिन् ।
‘गत १४ गते सभामुखले राजीनामा दिइसके पछाडि सभामुख पद रिक्त रह्यो । सभामुख पद रिक्त भएपछि धेरै असहज भयो, असहजताका बाबजुत मैले काम गरेँ,’ तुम्बाहाङ्फेले भनिन्, ‘प्रतिनिधिसभाको सभामुख नहुँदा उपसभामुखले बैठकको अध्यक्षता गर्ने छ भन्ने संविधानको व्यवस्थामा टेकेर मैले काम गरेँ । काम गर्दा धेरै अवरोध थियो, तर मैले त्यसलाई अवरोधका रुपमा लिइनँ ।’
आफू प्रतिनिधिसभामो सभामुख भएका कारण आफू सम्बद्ध सत्तारुढ दल (नेपाल कम्युनिस्ट पार्टी)ले दिएको निर्देशन नमानेको पनि तुम्बाहाङफेको भनाइ थियो ।
‘म उपसभामुख प्रतिनिधिसभाको हो, दलको उपसभामुख हैन । प्रतिनिधिसभाको उपसभामुखको रुपमा यो संस्थाको संरक्षण गर्ने जिम्मेवारी मेरो भएकाले दलले दिएको निर्देशनलाई मानिन्’ तुम्बाहाङफेले भनिन् ।
तुम्बाहाङ्फे मुलुकमा अहिले पनि पितृसत्ता जरा गाडेर बसेको बताइन् । ‘हामीले राजसंस्था फाल्यौं । तर, पितृसत्ता फाल्न त्यसभन्दा पनि ठूलो शक्ति आवश्यक छ,’ तुम्बाहाङफेले भनिन् ।
