मुख्यमन्त्री राईलाई भीम आचार्यको चुनौती– प्रदेशसभा भंग गर्ने धम्की नदिनोस्
काठमाडौं । नेपाल कम्युनिष्ट पार्टी (नेकपा) प्रचण्ड–नेपाल समूहका स्थायी कमिटी सदस्य एवं प्रदेश नम्बर–१ का सांसद भीम आचार्यले प्रदेशसभा भंग गर्ने धम्की नदिन मुख्यमन्त्री शेरधन राईलाई चुनौती दिएका छन् ।
शनिबार काठमाडौंमा पत्रकार सम्मेलन गरी प्रदेश सांसद आचार्यले मुख्यमन्त्री राईसँग प्रदेशसभा भंग गर्ने तागत नभएको बताए । मुख्यमन्त्रीले प्रदेशसभाका सभामुख, उपसभामुख र सांसदहरुलाई धम्क्याउने र तर्साउने काम गरिराखेको उल्लेख गर्दै उनले त्यसको कडा प्रतिवाद हुने समेत बताए ।
उनले सरकारविरुद्ध अविश्वासको प्रस्ताव दर्ता भएपछि मुख्यमन्त्री राई संसदबाट भागिरहेको आरोप लगाए । संविधानले नै २५ प्रतिशत सांसदहरुलाई सरकारको विरुद्धमा अविश्वासको प्रस्ताव दर्ता गर्ने अधिकार दिएको र त्यसलाई प्रक्रियामा लैजानुपर्नेमा संसद् नै बस्न नदिइएको उनको भनाइ छ ।
सरकार आफैँले बोलाएको संसद् आफैँले अवरोध गरिरहेको उनले बताए । आफूहरु प्रतिगमनको विरुद्धमा आन्दोलन गरिरहेको र जनताले समेत साथ दिएकोले प्रतिगमनलाई घुँडा टेकाएर छाड्ने उनले उल्लेख गरे । प्रतिगमनकारी मतियार र समर्थकहरुलाई जसरी पनि ‘ट्रयाक’मा ल्याउने आचार्यले बताए ।
प्रदेशसभा बैठक भोलिदेखि लगातार बस्नुपर्ने र अविश्वासको प्रस्तावमा छफफल भई टुंगोमा पुग्नुपर्नेमा उनले जोड दिए । नेपाली कांग्रेस र जनता समाजवादी पार्टीले पनि अविश्वासको प्रस्तावको पक्षमा साथ दिने आचार्यको दाबी छ ।
