काठमाडौं महानगरले सञ्चार रजिष्ट्रारको काम गर्ने, प्रेस पाससमेत दिने तयारी
काठमाडौं । काठमाडौं महानगरपालिकाले सञ्चार माध्यमहरूलाई दर्ता, नवीकरण र नियमन गर्न सञ्चार प्रतिष्ठान गठन गर्ने तयारी गरेको छ । महानगरले सञ्चार ऐन जारी गरिसकेको छ भने सूचना तथा सञ्चार विभागका प्रमुख महेश काफ्लेलाई सञ्चार रजिष्ट्रार तोकेको छ । केही दिनभित्रै भृकुटी मण्डपस्थित राष्ट्रिय सभागृह परिसरमा रजिष्ट्रारको कार्यालय स्थापना गर्ने काफ्लेले बताए ।
“रजिष्ट्रारको कार्यालयले दर्ता, नवीकरण, नियमनका साथै प्रेसपास पनि बितरण गर्नेछ,” काफ्लेले भने, “सञ्चार क्षेत्रको बृत्ति र विकासका लागी समानुपातिक विज्ञापन बितरणका साथै क्षमता विकासका थप कार्यक्रमहरू सञ्चालन गर्नेछ ।”
रेडियो, पत्रपात्रिका, टीभी, अनलाइनसहित ठूलासाना सबैखाले सञ्चार माध्यम दर्ता गरिने काफ्लेले जानकारी दिए । साथै महानगरभित्र सञ्चालित सबै सञ्चार माध्यमको अभिलेख पनि राखिनेछ ।
“संविधानले दिएको अधिकार प्रयोग गर्न लागिएको हो । त्यसैले एक सय वाटको एफएमलाई मात्रै अनुमति दिने संघीय कानून अपुरो छ,” काफ्लेले भने, “सबै किसिमका सञ्चार सँस्थाहरूलाई दर्ता, नवीकरण र नियमन गरि हाम्रो अभिलेखमा समेट्दैछौँ ।”
रजिष्ट्रारको अध्यक्ष मिडिया क्षेत्रमा कम्तीमा १० बर्ष काम गरेको विषय बिज्ञ ४ बर्षका लागी खुल्ला प्रतिस्पर्धाबाट नियुक्त गरिने व्यवस्था छ ।
