सोलुखुम्बुका भूमिहीन दलित, सुकुम्बासी र अव्यवस्थित बसोवासीलाई निस्सा दिने आयोगको तयारी
सोलुखुम्बु । राष्ट्रिय भूमि आयोग सोलुखुम्बुले जिल्लाका भूमिहीन दलित, भूमिहीन सुकुम्बासी तथा अव्यवस्थितबसोवासीलाई निस्सा वितरण गर्ने तयारी गरेको छ । राष्ट्रिय भूमि आयोग गठन (पहिलो संशोधन) आदेश २०७८ बमोजिम गठित आयोगको जिल्ला समितिले बुधबार सल्लेरीमा पत्रकार सम्मेलनको आयोजना गर्दै यस्तो जानकारी दिएको हो ।
आयोगले सोलुखुम्बुमा रहेका ८ वटै स्थानीयतहहरुसँग २०७९ भदौ ३ गते कार्यसहमतिपत्रमा हस्ताक्षर गरेको थियो । त्यस लगत्तै आवेदनका लागि भदौ २९ सूचना प्रकाशन/प्रसारण गरी स्थानीयतहमार्फत लगत संकलनको कार्य अघि बढाएको र निस्सा वितरणको अन्तिम तयारी भइरहेको सम्मेलनमा आयोगका अध्यक्ष उत्रमान राईले जानकारी गराउनुभयो । आयोगसँग सम्बन्धित कार्यलाई अगाडि बढाउन कर्मचारीको व्यवस्थापन गर्न नसक्दाअसहजता भएको समेत बताउनुभयो ।
पत्रकार सम्मेलनमा स्थानीयतहका नेतृत्वलाई आयोगका अध्यक्ष राईले कार्य सहमतिपत्र अनुसार प्राथमिकताका साथ भुमिका खेल्नका लागि अनुरोध समेत गर्नुभयो । सोलुखुम्बुमा हालसम्म नेपाल सरकार जनिएको जग्गा नरहेको देखिएकाले जग्गाप्राप्ति नै आयोगको प्रमुख चुनौती रहेको पनि अध्यक्ष राईले बताउनुभयो ।पहिलो चरणमा सोलुदुधकुण्ड नगरपालिका र थुलुङ दुधकोशीगाउँपालिकाका निवेदकहरुको विवरण राष्ट्रिय भूमि आयोग सूचना प्रणालीमा प्रविष्टि गरि सकिएको र उनीहरुलाई तत्काल निस्सा वितरण गरिने अध्यक्ष राईले बताउनुभयो ।
नाल्सीसमा प्रविष्ट भएकाहरुको बारेमा उजुर वाजुर वा दावीविरोधका लागि चाँडै नै सूचना प्रकाशन/प्रसारण गरी निस्सा वितरण गर्ने पनि आयोगका अध्यक्ष राईले बताउनुभयो ।
जसका लागि भूमिहीन दलित र सुकुम्बासीको सन्दर्भमा ७दिने र अव्यवस्थितबसोवासीको सन्दर्भमा १५ दिने सूचनाप्रकाशन/प्रसारण हुने आयोगले जनाएको छ । निस्सा प्रमाणित भएपछि निवेदकहरुले नाप नक्सा भइ आवास प्रयोजकालागि ३४० वर्गमिटर र कृषि प्रयोजनका लागि ३ हजार वर्गमिटर जग्गा प्राप्त गर्नेछन् । उपलब्ध भएमा नेपाल सरकारको जग्गा वा उपलब्ध नभएमा सम्बन्धित स्थानीयतहले खरिद गरी जग्गा उपलब्ध गराउने आयोगले जनाएको छ ।
सोलुखुम्बुमा हालसम्मको तथ्यांकअनुसार सोलुदुधकुण्ड नगरपालिकामा सबैभन्दा धेरै भूमिहिन दलित ६, भूमिहिन सुकुम्बासी ९४ र अव्यवस्थितबसोबासी २ जना गरी १०२ जनाले जग्गा प्राप्तिका लागि निवेदन दिएको समेत आयोगले जनाएको छ ।
माप्य दुधकोशीगाउँपालिकामा सबैभन्दा थोरै १ जना भूमिहीन दलितको मात्रै निवेदन परेको छ । थुलुङ दुधकोशी गाउँपालिकामा ४ जना भूमिहिन दलित,१८ जनाभूमिहिन सुकुम्बासी र ९ जना अव्यवस्थित बसोबासी गरी जम्मा ३१ जनाले निवेदन दिएको आयोगले जनाएको छ भने लिखुपिके गाउँपालिकामा तथ्यांकन आइसकेको तर अनुमानित १५ जनाले निवेदन दिएको आयोगले जनाएको छ । जिल्लाका बाँकी ४ स्थानीय तह खुम्बु पासाङल्हामु, महाकुलुङ, सोताङ र नेचासल्यान गाउँपालिकामा भने कुनै निवेदन नपरेको आयोगले जनाएको छ ।
कतिपय स्थानीय तहका लागि दोस्रो सूचना प्रकाशन/प्रसारणको आवश्यकता महसुस समेत भएको भन्दै आयोगले ती स्थानीयतहमा समेत तिब्र गतिमा कार्य सम्पन्न गर्ने आयोगका विज्ञ सदस्य गणेश कुमार राईले बताउनुभयो । नाल्सीसमा प्रविष्ट गर्नुपर्ने निवेदकहरुको विरणलाई पनि चाँडै प्रविष्ट गराई बाँकी निस्सा वितरण गरिने समेत उहाँले जानकारी गराउनुभयो ।
