थुलुङ दुधकोशीद्वारा चारवटा मोटरेबल पुल बनाउने निर्णय

चैत ९, सोलुखुम्बु । सोलुखुम्बु जिल्लाको थुलुङ दुधकोशी गाउँपालिकाले चार वटा मोटरेवल पुल निर्माण गर्ने भएको छ । गाउँपालिका अध्यक्ष असिम राईको अध्यक्षतामा शुक्रवार सम्पन्न कार्यपालिका बैठकले पालिकाको विभिन्न वडा जोड्ने नदीमा मोटरेवल पुल निर्माण गर्ने निर्णय गरेको पालिका प्रवक्ता भोजराज कार्कीले जानकारी दिनुभयो ।

पालिका केन्द्र मुक्लीसंग बिभिन्न वडालाई जोड्ने सडक निर्माण सकिएकाले अब भने खोला तथा नदीमा पक्की पुल निर्माण गरि बाह्रै महिना सवारी सञ्चालन गर्ने पालिकाले जनाएको छ । प्रवक्ता कार्कीका अनुसार थुलुङ दुधकोशी गाउँपालिका दुई काँगेल र नेचासल्यान-२ जोड्ने तथा वडा नम्बर ३ पञ्चन र नेचासल्यान-३ नेचा जोड्ने सोलु खोलामा पक्की पुल निर्माण हुनेछ । यस्तै वडा नम्बर ६ मुक्ली र वडा नम्बर ७ को बर्खुघाट र वडा नम्बर ६ र ७ को जुकेपानीमा पक्की पुल निर्माणको लागि बजेट व्यवस्था गर्ने निर्णय गरिएको छ ।

अहिले वडा नम्बर ६ मुक्ली र वडा नम्बर २ काँगेल जोड्ने सीकुखोलामा पक्की पुल निर्माणको कार्य अन्तिम चरणमा पुगेको छ भने काँगेल र जुबु ४ जोड्ने बादे स्थित दुधकोशी नदीमा निर्माण भइरहेको पुलको काम करिब ४५ प्रतिशत सकिएको निर्माण कम्पनीले जनाएको छ ।

मुक्ली जुबु जोड्ने बर्खुघाट स्थित दुधकोशी नदीमा पक्की मोटरेबल पुल निर्माणको लागी टेन्डर भइ सम्झौतासमेत भएपनि काम अघि बढ्न सकेको छैन । जसको लागि गाउँपालिकाको तर्फबाट निर्माण कम्पनी देखि संबन्धित कार्यालयलाई समेत तत्काल कार्य अघि बढाउन ताकेता गरिरहेको गाउँपालिका अध्यक्ष असिम राईले बताउँनुभयो ।

निर्माण व्यवसायी महासंघका केन्द्रीय अध्यक्ष समेत रहेका रबी सिंले ठेक्का पारेको भएपनि कार्य अघि नबढाउँदा यहाँका हजारौ मानिस आक्रोशीत बनेका छन् ।