मोटरसाइकल दुर्घटनामा परि ज्यान गुमाएका तामाङको परिवारलाई मेखराज तामाङ नेतृत्वको टिमबाट १ लाख ९६ हजार सहयोग प्रदान
सोलुखुम्बु / २०८२ साल असार २४ गते सोलुखुम्बुको थुलुङ दुधकोशी गाउँपालिका १ स्थित नेले बजारबाट घर फर्किने क्रममा शिकुखोलामा मोटरसाइकल दुर्घटनामा परि ज्यान गुमाएका मिङ्मार तामाङका परिवारलाई आर्थिक सहयोग प्रदान गरिएको छ । स्थानीय समाजसेवी मेखराज तामाङको विशेष पहलमा सो सहयोग रकम संकलन भएको १ लाख ९६ हजार ८५ रुपैयाँ सहयोग रकम मंगलबार परिवारलाई हस्तान्तरण गरिएको हो ।
तामाङ संस्कारअनुसार मंगलबार मृतकको अन्तिम घेवाको अवसरमा अभियन्ताको टिम घरमै पुगेर सो सहयोग रकम हस्तान्तरण गरेको हो ।
तामाङका श्रीमती सहित ३ छोरीहरु रहेका र उनीहरुको पढाईलाई विशेष ध्यानमा राखेर सहयोग रकम संकलन गरिएको थियो । बालबच्चाहरुको भविष्य उज्वल बनाउन साथै अध्ययनलाई निरन्तर अगाडी बढाउनका निमित्त आर्थिक सहयोग संकलन गरिएको अभियन्ता मेखराज तामाङले बताए ।
उनकाअनुसार स्थानीय छरछिमेकी, आफन्त र देश विदेशमा रहेका सहयोगी व्यक्तिहरुबाट सहयोग रकम संकलन गरिएको हो । 
