कोरोना संक्रमणबाट बच्न नेपाली महावाणिज्य दूतावास हङकङका सबै सेवा डिजिटलाइज
काठमाडौं– नेपाली महावाणिज्य दूतावास हङकङले सेवाग्राहीहरुलाई दिँदै आएको सम्पुर्ण सेवा तथा सूचनाहरु डिजिटल प्रणाली मार्फत दिने भएको छ ।
कोरोना भाइरसको संक्रमणबाट जोगिन यस्तो उपाय अपनाइएको महावाणिज्य दूतावासले उल्लेख गरेको छ ।
आगामी फागुन ५ गतेबाट सेवाग्राहीहरुलाई दिँदै आएको सम्पूर्ण सेवा तथा सूचनाहरु डिजिटल प्रणाली ‘ई प्रणाली’मार्फत प्रदान गर्ने उसले जनाएको हो ।
भिषा, पासपोर्ट लगायतका विभिन्न सेवा प्रदान गर्ने क्रममा विभिन्न देशका विभिन्न क्षेत्रबाट आएका सेवाग्राहीहरुको भीड लाग्दा भाइरस संक्रमण हुन सक्ने भन्दै यस्तो व्यवस्था गरिएको महावाणिज्य दूतावासले जनाएको छ ।
महावाणिज्य दूतावासका अनुसार कोरोना भाइरस संक्रमणलाई रोकथाम गर्न दूतावासले दिँदै आएको प्रत्यक्ष सेवा र सूचना आदिलाई अर्को सूचना जारी नभएसम्मका लागि डिजिटल प्रणालीमार्फत सेवा प्रदान गर्ने निर्णय गरेको जनाएको छ ।
महावाणिज्य दूतावासले फेसबुक पेजमा कोरोना भाइरसको प्रकोपलाई नियन्त्रण गर्न मुख्यभूमि चीनबाट हङकङ प्रवेश गर्ने सम्पूर्ण यात्रुहरुलाई अनिवार्य रुपमा १४ दिने क्वारेन्टाइनमा राखिने नियम हङकङ सरकारले गत ८ फेब्रुअरीबाट लागू गर्ने भन्ने सूचना प्राप्त भएकापश्चात त्यसको जानकारी महावाणिज्य दूतावासमार्फत सेवा लिने सेवाग्राहीहरुलाई जानकारी गराउनु परेको बताएको छ।
