स्याङ्बुचेमा प्रथम राष्ट्रिय याक दिवस मनाइदै
सोलुखुम्बु । सोलुखुम्बुको स्याङ्बुचेमा आज बैशाख ७ गते आइतबार प्रथम राष्ट्रिय याक दिवस मनाइदै छ । प्रधानमन्त्री केपी शर्मा ओलीले काठमाण्डौंमा सम्बोधन गर्ने र खुम्बु पासाङल्हामु गाउँपालिका ४ स्याङ्बुचेमा भने स्थानीय, याक पाल्ने कृषकहरुसँग मिलेर प्रथम याक दिवसलाई मनाउने कार्यक्रम तय गरिएको छ ।
गत असोज २ गते नेपाल सरकार मन्त्री परिषद्को निर्णयअनुसार यो दिवस घोषणा गरिएको थियो ।
विशेष गरेर याकको जैविक, आर्थिक र सामाजिक महत्वलाई उजगार गर्नका साथै देशको याकको सरंक्षण, प्रजनन सुधार तथा हिमाली समुदायको समृद्धीका लागि पर्वद्धन गर्ने यो दिवसको उद्देश्य राखिएको छ ।
वि.सं. २०३० साल बैशाख ७ गते चौरी फार्मको नामले स्थापना भएको कार्यालयको नाम परिमार्जन हुँदै २०७५ साल साउन १ गतेबाट याक अनुवाशिंक स्रोत केन्द्र नाम रहेको छ ।
अनुवाशिंक स्रोत केन्द्र स्याङ्बुचेको तथ्यांक अनुसार खुम्बु क्षेत्रमा अन्दाजी सयको हाराहारीमा याक पाल्ने किसान रहेका छन् । उनीहरुले ९ सय ९६ वटा याक, ५ सय ८२ वटा नाक र १ सय ४६ वटा चौरी गरेर कुल १ हजार ९ सय ४३ वटा याक पालन गरि रहेका छन् ।
