आरोहण कल्याणकारी कोषका लागि विनासर्त २० लाख सहयोग गर्ने वरिष्ठ पर्यटन व्यवसायी फुर गेल्जे शेर्पा (फुर्वा ग्याल्जेन)को घोषणा
काठमाडौं । नेपाल पर्वतारोहण संघ (एनएमए) आसन्न निर्वाचनका लागि अध्यक्ष पदका दाबेदार वरिष्ठ पर्यटन व्यवसायी फुर गेल्जे शेर्पा (फुर्वा ग्याल्जेन)ले आरोहण कल्याणकारी कोषमा २० लाख रुपैयाँ सहयोग गर्ने घोषणा गर्नुभएको छ । एनएमए अन्तर्गत स्थापित उक्त कल्याणकारी कोषको वृद्धिविकास गर्दै लक्षित क्षेत्रमा प्रभावकारी काम गर्न सकियोस् भन्ने पवित्र भावनाका साथ शेर्पाले व्यक्तिगत रुपमा विनासर्त सहयोग प्रदान गर्न लाग्नुभएको हो ।
उक्त कल्याणकारी कोष पर्वतारोहणको क्रममा ज्यान गुमाएका वा घाइते भएका गाइड, शेर्पा, सहयोगी तथा नेपाली आरोहीहरूका लागि आर्थिक सहयोग पुर्याउने महत्वपूर्ण माध्यम हो। कोष प्रभावकारी रूपमा खडा गरिए पनि आवश्यक आर्थिक स्रोतको अभावले गर्दा यसले अपेक्षित प्रभाव देखाउन सकेको छैन।
“म पैसा धेरै भएर होइन, मन भएर सहयोग गर्दैछु” सहयोग रकम घोषणा गर्दै उहाँले भन्नुभयो “मैले साना-ठूला धेरै हिमालहरू चढेको छु। मेरो जीवनको ४० वर्षभन्दा बढी समय यही क्षेत्रमा बितेको छ। मेरो ससुरा बुवाको ज्यान पनि हिमालमै गएको हो । त्यसैले यो कोषप्रतिको मेरो सम्बन्ध केवल पेशागत होइन, व्यक्तिगत भावनासँग पनि जोडिएको छ।”
आवश्यक कानुनी प्रक्रिया पूरा गरेर सो सहयोग रकम एनएमएलाई औपचारिक रूपमा हस्तान्तरण शेर्पाको भनाई छ । यस अभियानमार्फत शेर्पाले आरोहण कल्याणकारी कोषलाईसंस्थागत, दिगो र सबै पर्वतारोहण क्षेत्रको हितमा केन्द्रित गर्न मार्ग प्रशस्त गर्नुभएको छ, जुन भविष्यका लागि एक अनुकरणीय र ऐतिहासिक कदम बन्नेछ भन्दा फरक नपर्ला ।
उहाँले एनएमएमा आफु लिन नभई केही दिनका लागि जान लागेकोसमेत बताउनुभयो ।
“मेरो ४० वर्षको अनुभवलाई संस्थाको हितमा पूर्ण रूपमा खर्च गर्नेछु । चुनाव त आउँछ जान्छ” अध्यक्ष पदका लागि आफ्नो उम्मेदवारी के का लागि भन्ने विषयमा शेर्पाले थप्नुभयो “म एकथान पद पाउनका लागि होइन, सेवा र समर्पणका लागि आएको हुँ। नेपाली पर्वतारोहीहरूको हकहित र कल्याणका लागि म सधैं इमानदार, निष्ठावान र पारदर्शी भएर काम गर्ने प्रतिबद्धता व्यक्त गर्दछु।”
