एनएमए निर्वाचनमा शेर्पाको इन्ट्री, साझा र स्वतन्त्र टिमसहित मैदानमा फुर्वा ग्याल्जेन शेर्पा
काठमाडौं, १२ असार । नेपाल पर्वतारोहण संघ (एनएमए)को आसन्न निर्वाचनमा वरिष्ठ पर्यटन व्यवसायी फुर्वा ग्याल्जेन शेर्पाले अध्यक्ष पदमा उम्मेद्धारी दिने भएका छन् । आगामी २०८२ साल भदौं ७ (२३ अगष्ट २०२५) मा सम्पन्न हुन लागेको निर्वाचनमा शेर्पाले व्यवसायिक टिमको नेतृत्व गर्दै उम्मेद्धारी दिन लागेका हुन् ।
कांग्रेस, एमाले र माओवादी केन्द्रनिकट संगठनले आ-आफ्नो तर्फबाट छुट्टाछुट्टै अध्यक्षका उम्मेदवार सार्वजनिक गर्दै गर्दा सबैलाई समेट्दै सशक्त टिमसहित मैदानमा उत्रने रणनीति उनको छ । मंगलबार उनले औपचारिक रुपमा आफ्नो उम्मेदवारी घोषणा गर्दैछ्न् ।
सोलुखुम्बुमा जन्मिएका शेर्पाले आवश्यकताले आफुले उम्मेद्धारी दिन लागेको भन्दै निश्चित एजेण्डा लिएर अघि बढ्न लागेको बताएका छन् ।
नेपाल पर्यटन बोर्डको सञ्चालक समिति सदस्य भएर निजी क्षेत्रको दर्विलो उपस्थिति जनाएका उनले विभिन्न कालखण्डमा पर्यटन क्षेत्रको बृद्धिविकास र नीतिगत तहको सुधारमा नेतृत्वदायी भूमिका निर्वाह गर्न सक्ने व्यक्तित्वका रुपमा आफुलाई स्थापित गरेका छन् ।
नेपाल वायूसेवा निगमको सञ्चालक समिति, ट्रेकिङ एजेन्सिज एसोसिएशन अफ नेपाल (टान)को कार्यसमितिमा सदस्य, महासचिव हुँदै उपाध्यक्ष भएर काम गरिसकेका उनले एनएमएमासमेत एक कार्यकाल कार्यसमितिमा बसेर जिम्मेवारी वहन गरेका छन् । उनको ट्रेकिङ, हेलिकोप्टर, होटल तथा विभिन्न क्षेत्रमा ठूलो लगानी छ । आफ्नो व्यवसायको अलावा सामाजिक सेवामासमेत उनको महत्वपूर्ण योगदान छ ।
