ठमेल पर्यटन विकास परिषदको प्रमुख सल्लाहकारमा डा. थपलिया, पूर्वमन्त्री मनाङ्गे सम्मानित
काठमाडौं, २६ भदौं । ठमेल पर्यटन विकास परिषदले पूर्व अध्यक्ष डा. रामशरण थपलियाको संयोजकत्वमा तीन सदस्यीय सल्लाहकार समिति गठन गरेको छ । बुधबार आयोजित एक समारोहबीच परिषदको प्रमुख सल्लाहकारमा डा. थपलिया, सल्लाहकारको रुपमा परिषदकी पूर्व उपाध्यक्ष गीता गुरुङ र कमल भण्डारीलाई बधाई तथा शुभकामनासहित औपचारिक रुपमा प्रमाणपत्र प्रदान गरिएको हो ।
गत साउन ७ गते सम्पन्न परिषदको बैठकले विगत लामो समयदेखि पर्यटकीय नगरी ठमेल क्षेत्रको वृद्धिविकास सँगसँगै सिंगो मुलुककै पर्यटन क्षेत्रको नेतृत्वदायी भूमिका निर्वाह गर्दै आउनुभएका डा. थपलियालाई प्रमुख सल्लाहकार र पर्यटन क्षेत्रको विकासमा योगदान गर्दै आउनुभएका गुरुङ र भण्डारीलाई सल्लाहकारको रुपमा मनोनित गर्ने निर्णय गरेको थियो ।
परिषदको विधान २०४७ (पाचौं संशोधन २०७२ सहित)को दफा १६ अनुसार प्रमुख सल्लाहकार र सल्लाहकार मनोनित गरिएको परिषदका अध्यक्ष ध्रुव अधिकारीले जानकारी दिनुभयो ।
सोही अवसरमा विगत लामो पूर्वमन्त्री तथा गण्डकी प्रदेश सभा सदस्य राजिव गुरुङ (दीपक मनाङ्गे)लाई विशेष सम्मान गरिएको छ । विगत समयदेखि ठमेल क्षेत्रलाई पर्यटकीय नगरीको रुपमा स्थापित गर्दै सिंगो मुलुकको पर्यटन प्रवद्र्धन र विकासमा अभिभावकीय र नेतृत्वदायी भूमिका निर्वाह गरेवापत उहाँलाई सो सम्मानित गरिएको परिषदले जनाएको छ ।
