पर्यटन बोर्डमा निजी क्षेत्रबाट ५ जना सदस्य नियुक्त
काठमाडौं । नेपाल पर्यटन बोर्डमा निजी क्षेत्रबाट पाँच जना बोर्ड सदस्य नियुक्त भएका छन् । बोर्ड सदस्य छनोट समितिले सिफारिस गरेको आधारमा पर्यटन व्यवसायी पर्यटनकर्मी डा. शोभिता श्रेष्ठ ढकाल, पेम्बा शेर्पा, खुमबहादुर सुवेदी, सन्तोष पोखरेल र श्रीजना केसीलाई सदस्यमा नियुक्त गरिएको हो ।
पर्यटन ऐन तथा प्रचलित कानुनी व्यवस्थाअनुसार गठित बोर्ड सदस्य छनोट समितिले खुला आवेदन प्रक्रियामार्फत प्राप्त आवेदनहरूको मूल्याङ्कनपछि उनीहरुलाई बोर्ड सदस्यका रूपमा नियुक्त गरेको जनाइएको छ ।
बोर्ड सदस्यका लागि गरिएको खुला आह्वानमा देशभरबाट करिब एक हजार एक सय (१,१००) जनाको आवेदन परेको थियो । प्राप्त आवेदनहरूको योग्यता, व्यावसायिक अनुभव, पर्यटन क्षेत्रमा पुर्याएको योगदान, नेतृत्व क्षमता तथा समग्र दक्षताको आधारमा छनोट प्रक्रिया सम्पन्न गरिएको बोर्डले जनाएको छ ।
संस्कृति, पर्यटन तथा नागरिक उड्डयन मन्त्रालयका अनुसार निजी क्षेत्रको प्रभावकारी प्रतिनिधित्व सुनिश्चित गर्दै पर्यटन क्षेत्रको नीति निर्माण, गन्तव्य प्रवर्द्धन, लगानी प्रवर्द्धन तथा सार्वजनिक-निजी साझेदारीलाई थप सुदृढ बनाउने उद्देश्यले खुला, प्रतिस्पर्धात्मक र पारदर्शी प्रक्रियाबाट बोर्ड सदस्य चयन गरिएको हो ।
